هل تعرف ما هي قائمه الشرف الوطني المصري ؟؟

للحصول علي عضويه في مملكة تاميكوم

مؤسسة قلادة منتدي مملكة تاميكوم قائمه الشرف الوطني المصري - قلادة تاميكوم

النتائج 1 إلى 9 من 9

الموضوع: أعمال المتسابقين

أعمال المتسابقين في مسابقة في أدب الأطفال هنا يتم وضع الأعمال الأدبيه وذلك بعد إرسالها إلى بريدي الخاص بالمملكة وسأقوم بوضعها في هذا الموضوع بخط واحد وبحجم واحد لحيادية التصويت

  1. #1
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي أعمال المتسابقين

    عدد المشاهدات : 5279
    أعمال المتسابقين
    في مسابقة في أدب الأطفال
    هنا يتم وضع الأعمال الأدبيه
    وذلك بعد إرسالها إلى بريدي الخاص بالمملكة
    وسأقوم بوضعها في هذا الموضوع
    بخط واحد وبحجم واحد
    لحيادية التصويت
    مع تمنياتي بالتوفيق للجميع

    المصدر: منتدي مملكة تاميكوم (تأسس عام 2007)


    Hulhg hgljshfrdk


  2. #2
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    عبدالرحمن والحلم
    كان ياما كان ياسعد ياإكرام وما يحلى الكلام إلا بذكر النبي عليه الصلاة والسلام , كان في هذا العصر وهذا الأوان ولد صغير اسمه عبدالرحمن ولد شقي وعنيد ودايما بيحب اللعب بالكبريت ومش بيبطل لعب وتنطيط وطول اليوم زعيق وتخبيط , وعبدالرحمن عمره في يوم ما ساعد أصحابة وكمان تاعب كل إخواتة بمقالبة وبحركاته وكل الناس كانت منزعجة من تصرفاته لأ و صوته عالي كمان ودايما بيشتكي منه كل الجيران , وفوق ده كله وقت الصلاة يبقى كسلان.
    مامته تقوله قوم اتوضا يقولها حاضر لما اخلص لعب بلاي ستيشن وألعب شوية بالعربيات والسوبرمان ويستنى لما يعدي آدان ووراه آدان , ويخلص اليوم وهو مصلاش وبكده ربنا يكون منه زعلان ,لإنه كمان عمره ما حفظ أي سورة من سور القرآن ,
    وفي يوم من الأيام شاف عبدالرحمن في المنام أن وهو بيلعب بالكبريت أيديه اتحرقت حرق غويط فضل عبدالرحمن ينادي على كل الناس بصوت عالي وشديد لكن مفيش حد سمعه وفضل يبكي وهو وحيد , فجأة صحي عبدالرحمن من النوم وعرف إنه بيحلم, شكر ربنا في الحال وقال:
    مش هبقى أناني ولا عمري هلعب بالكبريت تاني وهساعد كل محتاج ومش هعمل أي إزعاج ولازم أسمع الكلام وأصلي فرض ربنا في الوقت تمام

  3. #3
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    سمسمه
    حَابيبى الحلوين صلوا على النبى (قولوا ) عليه الصلاة والسلام
    كان فيه بنت جميله قوى إسمها إيه؟؟ سمسمه
    مامتها كانت بتحبها قوى وهى كمان ..
    بس ياخساره سمسمه كان فيه عندها مشكله كبييره أوى ..وهى أنها كانت مش بتحب تسرح شعرها..
    كل يوم أول مامتها ما تيجى تسرحلها تطلع تجرى وتغلب مامتها خالص وفى الأخر مامتها تزعل منها وهى كمان بتكون زعلانه أنها زعلت مامتها بس تعمل إيه ماكنتش بتحب تسرح..
    وبعدين.. فضلت تتمنى وتقول يااااااااااه لو أبقى صغيره أوى قد النحله النونو دى وماما ما تشوفنيش عشان ما تقدرش تسرحلى ..وبعدين مين سمعتها؟؟
    الساحره الشريره فأخدت عصيتها السحريه وآلت هبراكدابرا ..هبراكدابرا إتحولى ياسمسمه لبنت صغيره قد النحله النونو.
    فبصت لقت نفسها صغرت جداً وبقت صغيره خالص ومامتها مبأتش شايفها وهى بقت خايفه أحسن مامتها أو حتى القطه تدوس عليها أو العصفور الصغير فى الجنينه يفكرها دوده ويخدها وياكولها وفضلت تنادى ياماما أنا هنا أنا تحت بصيلى ..أوعى تدوسى عليه أستنينى ياماما ومامتها مش سمعاها خالص ..
    ياخبر .. وبعدين
    وبعدين آلت أنا حطلع بره فى الجنينه يمكن حد يشوفنى ويساعدنى .. فمين شافتها؟؟
    الفراشه بالصدفه كانت حطه جنبها على الأرض عشان ترتاح شويه وتشم الورده الجميله فبصت لقتها تبصلها فسألتها الفراشه وآلت لها أنتى مين أنا أول مره أشوفك هنا هو أنتى دوده ولا إيه؟؟
    آلتلها لا أنا سمسمه ألىّ ساكنه فى البيت ده بس الساحره الشريره سحرتنى وحولتنى صغيره كده عشان مكنتش بحب أسرح شعرى من فضلك يا فراشه ساعدينى عشان أرجع كبيره تانى وماما تشوفنى هى وبابا عشان مش حقدر أبعد عنهم وكمان مش حقدر أنام هنا فى الجنينه.. حخاف جداً من فضلك تساعدينى ..عشان ماما زمنها دلوقت قلقانه عليّ جداً ..
    وبعدين..
    الفراشه زعلت جداً علشانها وآلت لها طيب أنا أعرف مين ممكن يساعدك..الساحره الطيبه..بس دى بيتها فى آخر الغابه ولازم نوصللها بسرعه قبل الدنيا ما تضلم عشان مش حشوف الطريق إركبى على ضهرى وأنا حطير بيكى واوديكى عندها بس أمسكي كويس فى جناحى عشان ما تقعيش ..
    وبعدين..
    طارت بيها الفراشه وهى كانت خايفه تقع بس بعد شويه بقت مبسوطه خالص وهى شايفه تحتها كل الغابه والحيوانات والبيوت وشايفه جنبها العصافير طايرين وكمان الحمام بس أوعى يا فراشه توقعينى أو تتصدمى بحد من الطايرين جنبنا دول يارب نوصل بالسلامه..
    وبعدين ..
    وصلوا لغاية بيت الساحره الطيبه فنزلتها الفراشه وآلت لها أنا حسيبك دلوقت هنا عشان مش حقدر أدخل معاكى لازم أرجع عشان أنا كمان ماما زمنها قلقانه عليه يلا سلام ..وطارت
    يااااه إستنى يا فراشه حتسيبينى هنا إزاى لوحدى أنا خايفه خالص وكنت خلاص أعتبرتك صحبتى ..
    وبعدين مين شافها ؟؟
    الساحره الطيبه شافتها وآلت لها تعالى يابنت إدخلى وأوليلى إيه عمل فيكى كده وخلاكى تبقى صغيره كده ..
    سمسمه كانت خايفه جداً بس لقت أنها ست طيبه ومش زى الساحره التانيه الشريره عشان هى قربت منها ومسكتها من إدها وآلت لها ما تخافيش وطبطبت عليها ..
    سمسمه قعدت تعيط وتأول لها من فضلك ياطنط ساحره تساعدينى عشان أرجع كبيره تانى عشان أرجع بيتنا عند ماما وبابا وأوعدك عمرى ما حزعل ماما تانى وحخليها تسرحلى شعرى كل يوم أو إن شالله حتى أربع مرات فى اليوم مش حيهمنى المهم أرجع كبيره تانى ..
    الساحره الطيبه إتأثرت جداً بكلام سمسمه ودموعها وطبطبت عليها وآلت لها خلاص أنا قررت أساعدك وأرجعك كبيره تانى بس فيه شرط أنا حكون سامعاكى لو بعد كده غلبتى مامتك ومرضيتيش تسرحى أنا حاجى عندكم وحرجعك صغيره تانى ومش ممكن حرضه أرجعك كبيره تانى ..إتفقنا..
    سمسمه آلت لها طبعاً إتفقنا بس من فضلك بسرعه عشان أرجع قبل الدنيا ما تضلم ..
    الساحره آلت لها طيب غمضى عنيكى وشاورت عليها بالعصايه السحريه بتاعتها وآلت سلابادو متشيجابو..
    وفجأه هييييييييه..
    رجعت سمسمه كبيره تانى ..الله دى إيدى رجعت كبيره تانى ورجلى كمان يااااه أشكرك ياطنط ساحره أن مش عارفه أعملك إيه عشان أشكرك
    آلت لها الساحره الطيبه ..تسمعى بس كلام ماما..أوكيه..
    ودلوقت تعالى إركبى ورايا على المكنسه بتاعتى عشان نطير وأوصلك بيتكم ..
    طارت الساحره ومعاها سمسمه وهى فرحانه خالص عشان حترجع تانى لبيتها..
    وبعدين وصلوا هناك ونزلتها على سطح بيتها وآلت لها الوداع دلوقت بس ما تنسيش الوعد لو ما سمعتيش كلام ماما أنا حاجى وأرجعك صغيره تانى ..باااااااااااى
    نزلت سمسمه من على السطح ولقت مامتها بتدور عليها وأول ما شافتها جريت عليها ورمت نفسها فى حضنها وآلت لها سامحينى ياماما أنا عمرى ما حزعلك منى أبداً ويلا هاتى الفرشه والتوك وتعالى سرحيلى عشان أنا عايزه شعرى يبقى جميل ..
    مامتها باستها بوسه كبببببببيره
    وآلت لها أنتى حبيبة قلبى وعمرى
    وتوته توته خلصت الحدوته
    حلوه ولا ملتوته
    لو حلوه عليكى غنوه..
    ولو ملتوته عليكى حدوته..


  4. #4
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    البقره الحلوب
    كان ياما كان ياسعد يا اكرام ومايحلى الكلام الا بذكر النبى عليه الصلاة والسلام كان فى بقرة جميلة وصغنونة وشقية اسمها (توتة) وكانت توتة معاها بقر كتيييييييييييييير فى نفس الحظيرة وكان كل يوم عم محمد صاحب الحظيرة يصلى الفجر ويحلب البقر ويوزع الحليب على اهل القرية وكانوا كلهم بيحبوا عم محمد لانه حد طيوب خالص وبيحب كل الناس وكان كل البقر بيجيب لبن كتير وكانت توتة ما بتجبش لبن خالص وكانت يتزعل جدا لانها نفسها تساعد اهل القرية وتديهم لبن لكن مفيش فايدة لان كل شئ بإيد ربنا (ونعم بالله) ومشيت توتة من الحظيرة عشان ما بتجبش لبن وقعد عم محمد يدور عليها فى كل مكان وكل اهل القرية بيدوروا معاه لانهم كانوا بيحبوا توتة لانها مع انها شقية جدا لكنها طيبة وحنينة وبتسمع كلام كل الناس ومشيت توتة بعيد بعيد بعيد وقعدت تدعى ربنا كتير وتقول يارب خلينى اجيب لبن عشان اهل القرية الغلابة اللى هيا بتحبهم وعشان هيا طيبة وبتسمع الكلام استجاب ربنا لدعاها وبقت تجيب لبن كتير جدا ورجعت توتة تانى لاهل القرية عشان تساعدهم وتفرحهم وتفرح عم محمد وبقت فرحانة جدا وكل الناس فرحوا وتوتة توتة فرغت الحدوتة

    الدروس المستفادة من القصة
    1- التاكيد على الاطفال على الصلاة زى عم محمد
    2- التاكيد على مساعدة الناس
    3- التاكيد على الدعاء لله عند الحاجة
    4-التاكيد على سماع كلام الناس الاكبر سنا
    5-وان سماع الكلام بيخلى ربنا يساعدنا ويقبل دعواتنا



  5. #5
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    لا .. لا .. لا
    كان ياما كان يا سعد يا إكرام ما يحلى الكلام إلا بذكر النبى عليه الصلاة والسلام

    سلمى بنت جميله بس ياخساره عنيده دايما تقول لا...لا...لا
    ماما تقول اشربى يا سلمى اللبن ...سلمى تقول لا...لا...لا
    بابا يقول أغسلى يا سلمى سنانك سلمى تقول لا...لا...لا
    سلمى تقول لا...لا...لا دايما لا...لا...لا....
    وفى يوم من الأيام راحت سلمى ونامت
    فى الحلم كانت عطشانه جت تمسك الكوبايه ...الكوبايه قالت لا...لا...لا وياعينى سلمى عطشانه
    كانت كمان جعانه جت تاكل الشيكولاته ....الشيكولاته قالت لا...لا...لا.... وياعينى سلمى جعانه
    تعبت سلمى راحت تقعد على الكرسى ...الكرسى قال لا...لا...لا وياعينى سلمى تعبانه
    راحت تقول إزاى أنا عطشانه..جعانه..تعبانه إزاى بتقولوا لا...لا...لا

    قالولها وإزاى تقولى لماما وبابا لا...لا...لا...دا جزاء الى يقول دايما لا...لا...لا.
    سلمى قالت خلاص حرمت اقول لا...لا...لا
    صحيت سلم من النوم باست بابا وماما ..أسفه يا بابا ...اسفه يا ماما
    هشرب اللبن ..هغسل سنانى ...دايما حاضر ومفيش لا...لا...لا حرمت أقول لا...لا...لا.

  6. #6
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    رحلة إياد وجدّه وفؤاد
    السلام عليكم أحبائي الصغار..نبدأ الكلام بذكر خير الأنام سيدنا محمد عليه أفضل الصلاة والسلام
    يُحكى أن هناك ولد صغير اسمه إياد يعيش في بيت سعيد مع أسرته وجدّه فؤاد..كان إياد ذو خلق كريم وفي عمله جاد؛وكان يصلي مع أسرتهُ كل صلاة في الميعاد وكان يذاكر دروسه ويقوم بواجباته بإيجاد..وبعد أن يُنهي ذلك يجلس في حديقة منزله مع جدّه فؤاد ليحكي له جده على الأماكن التى زارها والذكريات وكان إياد مولعاً جداً بالرحلات لما فيها من متعه وفائدة واكتساب للمعلومات...وكان الجد فؤاد يُكافي إياد على حسن خلقه و عمله الجاد فيصطحبه معه لزيارة أماكن متنوعه في الأجازات
    وفي إحدى الأجازات قرر الجد فؤاد أن يصطحب معه حفيده إياد إلى إحدى الغابات..ليلعب ويمرح برفقة الطيور والحيونات وليتعرف على بعض المعلومات


    وعندما وصل إياد وجدّه فؤاد الى الغابه ابتسم إياد قائلاً: ماأجمل الطبيعه ياجدي وماأجمل الأشجار والزهور ثم نظر الى الحيوانات والطيور وهم يلعبون فقال: ماأجملهم ياجدي وهم فرحون ...هل أقبل عليهم وألعب معهم ..أم انهم سَيرفضون...?

    فقال الجد: خُذ نصيحتي كُن لطيفاً مع أي حيوان ولا تضايق منهم أحد وان عاملتهُ بودٍ يكن صديقاً للأبد...
    فقال اياد:سأفعل ذلك ياجدي وهذا وعد..

    والتفت إياد لهم قائلاً هل لي أن العب معكم وتجعلوني صديقاً لكم...فانطلق أحدهم قائلاً:أهلا بك في غابتنا؛ سنعلب معك لعبه.. سُيعطيك فيها كلٌ منا لغز .. ان أوجدت حلُه ..تصبح صديقاً لأوفى صُحبه ؛اخرج منديلك واربط به عينيك لتغمضها وسيخبرك كلٌ منا عن وصفهُ
    فإن علمت إسمهُ.. تصبح صديقاً يسكن قلبهُ... موافق...قال إياد: موافق وأخرج منديله وربط عينيه..


    تقدم الأول قائلاً

    :يبدأُ اسمي بحرف الكاف..تسمع صوتي مني تخاف..لكني للإنسان صديق..أحْرسهُ في كل طريق

    وأطارد أعداؤه لأني..مقدامٌ دوماً وجرئ



    صاح إياد :أعرفك أنت صديقي الكلب فهل تقبلني صديق؟

    هز الكلب رأسه قائلاًنعم نعم


    قال الثاني



    : قرّب قرّب قرّب... لا تخشاني... لا لاتهرب...إن تكُ طيب فأنا أطيب... وان تكُ قاسي فأنا أقسى..وأنا الأصعب

    ولدي أكثر من مخلب ..ويُمزيني زيل طويل..وعينان ليس لهما مثيل..تخشاني كل الفئران ...وطعامي سمكُ وألبان

    تكسبني صديقاً ان كنت..ممن يعطوني الأمان...

    صاح إياد: أعرفك طبعاً ياقطه..وأراكِ في كل مكان...ولأنك أنت صديقتي ....قطعاً أمنحك الأمان

    ابتسمت القطعه معلنةً صداقة إياد



    دخل الثالث:


    حزّر فزّر من أكون... يبدأ إسمي بحرف النون..منقاري حادٌ مسنون...أُحلق بجناحي ببراعه..جعلوني رمزاً للقوة...جعلوني رمزاً للشجاعه...

    صاح اياد...أنت النسر أسمع كثيراً عن قوتك ...وأراك وأرسم صورتك..على علم بلدي مصر

    ابتسم النسر قائلاً: أحسنت جداً ياإياد...سأجعلك صديقي طول العمر




    دخل الرابع


    : يبدأ اسمي بحرف الحاءِ..يصفوني دوماً بغبائي...لكن إن تعرفني حقاً..تكتشف نقائي وصفائي
    خادم للإنسان بوفاءِ..مهما وضعولي أثقال..لا أشكو ألمي وعنائي..


    قال إياد: أنا أعرفك أنا أعرفك...أنت صديقي الحمار وما أطيبك
    صاح الحمار: يالك من صديق رائع..ما أجملك


    دخل الخامس


    :يبدأ اسمي بحرف الباء..أنصتُ للناس بدهاء...وأكرر دوماً ماقالوا ...وأسمّعهم أحلى غناء


    قال إياد: أنت صديقي الببغاء..هيا..هيا نصبح أصدقاء...
    قفز الببغاء على كتف إياد وتبادلوا اللعب وهم سعداء



    كرر إياد اللعبه مع بقية الحيوانات والطيور..وقضى معهم وقت ممتع..وكان في غاية السعاده والسرور

    وبعد أن أنهى يومه شكر ربه على حُسن خلقه للطبيعه والحيوانات وشكر جده على الرحله الجميله التي أعطتهُ الكثير من المعلومات وذهب إلى مدرستهُ في اليوم التالي بكل سعاده ونشاط..وحكى لزملاؤه عن رحلته الشيقه وعندما جاء ميعاد حصة الرسم استأذن المعلم في رسم لوحه تضم أجمل الطيور والحيونات
    ورسم لوحه من أجمل اللوحات شكرهُ المعلم وزملاؤه عليها.....ففرح أياد وأخبرهم أن اللوحه جميله لأن الحيوانات جميله وأن الله خلق كل شئ جميل وهذا الإبداع بفضله أولاً ثم بفضل الرحلات ومافيهامن معلومات..

    والى هنا تنتهي الحكايه يا صغاري والى اللقاء مع رحلة جديده من رحلات إياد وجدّه فؤاد




    الأهداف التربويه من القصه

    -إعمال الفكر وتنشيط الذاكرة عن طريق عنصر التشويق في تعريف كل حيوان بنفسه
    ويُحبذ أن يبرز راوي القصه الإنفعالات عن طريق خفض ورفع صوتهُ والتركيز على السجع أثناء القراءه
    التأكيد على الصلاة في الميعاد وعلى العمل الجاد ...
    التأكيد على حسن معاملة الحيوان...
    -تدريب الطفل على الإستفاده من وقت الفراغ والأجازات...والاستفاده من خبرات الكبار...
    التأكيد على أهمية الثقه بين الصديقين...وأهمية الصداقه....
    -تنمية المهارات الابداعيه لدى الطفل عن طريق اظهارمحاولة إياد لرسم مارأى...
    -وتنمية الخيال الإبداعي لديه عن طريق تخيل أن الحيوانات تتكلم وتعبر عن نفسها....
    - تعزيز قيمة الشكر لله ولمن قدم لنا شيئا كما فعل إياد وشكر ربه على حسن خلقه ؛وشكر جده على الرحله

    تدريب الطفل على استخدام اللغه العربيه الفصحى واكسابه بعض المرادفات الجديده

  7. #7
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    مريوم والسوق
    صلوا على النبي وما يحلى الكلام إلا بذكر النبي عليه الصلاة والسلام ,كانت فيه بنت جميلة خالص اسمها مريوم ,شطورة وبتسمع الكلام وبتشرب اللبن الصبح وبتعمل واجباتها كلها أول ما ترجع من الحضانة علطول, وكمان بتساعد مامتها في توضيب البيت ولما تخلص مريم توضيب البيت تدخل مع مامتها المطبخ علشان يعملوا الغدا قبل ما بابا يرجع من الشغل.وفي يوم من الأيام فتحت مريم التلاجة علشان تجيب مكونات السلطة اللي هي الطماطم والفلفل والخيار والخضار,لكن للأسف مريم ملقتش في التلاجة أي حاجة من مكونات السلطة فنادت على مامتها وقالت لها"يامامي يامامي مكونات السلطة مش موجودة في التلاجة لازم نروح السوق أنا وأنتِ نشتريها وفعلا راحوا هما الاتنين السوق.
    مريم فضلت تبص على الخضروات والفواكه الجميلة اللي موجودة في السوق.شافت فاكهة طعمها لذيذ ولونها أصفر اسمها الموز وشافت كمان فاكهة طعمها جنان ولونها أحمر منقطة بنقط سوده ودي بقى اسمها الفراولة وفجأة شافت مريوم عند بياع الفواكه والخضروات حاجة مدورة وكبيرة ولونها أخضر لكن من جواها لونها أحمر وفيها بذر أسود كتير ودي اسمها البطيخة,وشافت كمان البطاطس اللي لونها أصفر والبازنجان الطويل اللي لونها أبيض ولونه كمان أسود والكوسة اللي لونها أخضر وشافت مريوم فاكهة جميلة بتحبها جدا الفاكهة دي لونها أصفر ومدورة واسمها البرتقال,مريوم كانت فرحانة أوي بشكل الخضروات والفواكة الجميلة,ماما مريوم
    اشترت مكونات السلطة ورجعوا بسرعة البيت وعملت مريوم طبق سلطة كبير ,باباها رجع من الشغل وقعدوا كلهم على الصُفرة بس قبل ما مريوم تاكل قالت بسم الله الرحمن الرحيم وحمدت ربنا على انه خلق لنا فواكه وخضروات جميلة وشكرته على نعمه الكثيرة
    وتوتة توتة خلصت الحدوتة

  8. #8
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    أنا حزينة جدا
    بكت باسمة وهي تشد شعرها غيظا , وتقول لأمها : أنا حزينة جدا يا أمي , لماذا شعري هكذا ؟أنا أريد شعرا أشقر مثل فرح .. أنا حزينة جدا لماذا عيناي هكذا ؟؟ أنا أريد عيونا خضراء مثل ليلى
    ضحكت الأم وقالت لا يجب أن تحزني لهذا السبب
    نامت باسمة وهي تتمنى لو استطاعت أن تغير هذه الأشياء
    مشت باسمة إلى الغابة وقابلت زرافة جميلة لكنها تبكي

    سألتها باسمة لماذا تبكين يازرافة .. قالت الزرافة : أنا حزينة جدا لماذا رقبتي طويلة هكذا أنا أريد رقبة مثل رقبة الدب



    , لمستها باسمة بحنان فتحولت رقبتها لرقبة دب , فرحت الزرافة جدا أكملت باسمة طريقها في الغابة فوجدت الدب يبكي فسألته : لماذا تبكي يادب ..قال الدب : أنا حزين جدا لماذا رقبتي هكذا أنا أريد رقبة مثل رقبة الزرافة



    , لمسته باسمة بحنان فتحولت رقبته إلى رقبة زرافة , فرح الدب جدا أكملت باسمة طريقها في الغابة فوجدت الأرنب يبكي سألته باسمة لماذا تبكي يا أرنب , قال الأرنب : أنا حزين جدا لماذا ذيلي قصير هكذا أنا أريد ذيلا طويلا مثل ذيل الحصان



    لمسته باسمة فتحول ذيله إلى ذيل حصان , فرح الأرنب جدا
    مشت باسمة بين أشجار الغابة تجد الحصان يبكي فسألته باسمة لماذا تبكي يا حصان , قال الحصان: أنا حزين جدا لماذا ذيلي طويل هكذا , أنا أريد ذيلا قصيرا مريحا مثل ذيل الأرنب




    , لمسته باسمة فتحول ذيله إلى ذيل أرنب, فرح الحصان جدا
    رجعت باسمة إلى البيت وفي الطريق وجدت الذباب يتجمع حول الحصان والحصان يبكي لأنه لا يستطيع أن يهش الذباب وقال الحصان كان ذيلي الطويل يساعدني ويمنع عني الذباب



    مشت باسمة في الطريق فوجدت الأرنب يبكي لأنه لا يستطيع القفز بسرعة وقال كان ذيلي القصير يساعدني في الهروب من الصيادين


    وصلت باسمة إلى الدب فوجدته ينام على الأرض ويبكي لأنه لا يستطيع ان يرفع رأسه بسبب الرقبة الطويلة التي تلتوي تحته,



    وقال الدب كانت رقبتي القصيرة مناسبة لطولي ورأسي
    تركته باسمة وذهبت إلى الزرافة فوجدتها جائعة وتبكي لأنها لاتستطيع أن تأكل أوراق الشجر من الغصون العالية وقالت الزرافة كانت رقبتي الطويلة تساعدني في الوصول لكل أطراف الشجرة



    استيقظت باسمة من نومها وهي تفهم أننا لا يجب أن نحزن للأشياء التي لا نستطيع تغييرها وأن الله خلقنا في أنسب صورة لحياتنا
    ضحكت باسمة وقالت لأمها : ياأمي أنا سعيدة جدا ا ؛لأن شعري هكذا وعيوني هكذا , أنا سعيدة جدا جدا لأن الله خلقني هكذا
    وتوته توته فرغت الحدوته

  9. #9
    مواطن في قمة الابداع الصورة الرمزية Mona amin
    تاريخ التسجيل
    May 2010
    المشاركات
    2,087

    افتراضي رد: أعمال المتسابقين

    أدهم ومارينا
    أدهم ولد صغير عنده خمس سنين .. بيحب الزراف من ايام كان عمره سنتين
    الحضانه نظمت رحله لحديقة الحيوان .. طبعاً أدهم اول من سجل إسمه
    ماريانا بنت صغيره عندها خمس سنين .. أول مره تروح حديقة الحيوان لوحدها
    أبو أدهم و أبو ماريانا أصدقاء منذ ان كانوا عمرهم خمس سنوات
    فى يوم الرحله أدهم و ماريانا كانوا مع بعض فى عربيه ابو ماريانا بيوصلهم المدرسه
    و قال لأدهم يأخد باله من ماريانا و يشرح لها الحيوانات
    الاتوبيس طلع من المدرسه و كان الاطفال بيغنوا مع المشرفه أغانى الكتكوت و الديك الشركسى و الفيل النونو و أبريق الشاى
    الأتوبيس وصل الحديقه و نزل الاطفال صفين ماسكين ايدين بعضهم دخلوا بنظام و ترتيب
    أول مكان كان قفص الببغاوات .. أدهم قال لماريانا إن الببغاوات بتحب المكسرات و الموز و الخس
    و إن الببغاء بيعيش لمده طويله.. ماريانا قالت لأدهم انها شافت الببغاء بيتكلم فى السيرك و ان اسمه العامى البغبغان
    ثانى شىء شافوه كان فرس النهر .. المشرفه قالت لهم ان فرس النهر كان بيعيش فى مصر فى الجنوب .. و كان من الحيوانات التى أعتقد قدماء المصريين انها مقدسه .. و ان اسمه الدارج هو سيد قشطه
    أدهم و ماريانا أخذوا من الحارس بعض البرسيم و اطعمو فرس النهر فى فمه الواسع
    ثالث مكان كان بيت الزراف .. أدهم قال لماريانا انه أطعم الزراف بإيده البرسيم عندما كان عمره سنتان فقط
    و ان الزراف تأكل الطعام لمده طويله و تخزنه فى معدتها و بعدها تجلس فى الظل و تسترجعه مرة أخرى و تمضغه
    ماريانا قالت انها رأت الأبقار فى مزارع الدير تفعل نفس الشىء و انها تظل طول النهار تمضغ ما أكلته
    سمعتهما المشرفه و قالت لهم هذا النوع من الحيوانات يسمى الحيوانات المجتره و اسم الزراف بالعاميه هو الزرافه
    استمرت جولة التلاميذ فى الحديقه لمدة أربع ساعات و تعلموا الكثير من المعلومات و كذلك اطعموها جميعا
    فى رحلة العوده رغم تعبهم .. استمروا فى الغناء و المسابقات حول الحيوانات التى شاهدوها
    و بعد وصولهم للمدرسه كانت سيارة والد أدهم فى انتظارهم وأوصلهم للبيت
    و فى المساء اجتمعت الأسرتين و فاجأهم والد أدهم و والد ماريانا بفيلم فيديو من صور الطفلين مع الحيوانات عندما كانا فى الثالثه من عمرهم
    و وعداهما انهم فى الاسبوع القادم سيذهبون جميعا لزيارة مجمع الأديان فى مصر القديمه
    فوالد أدهم كان هو مهندس التصميمات للمنطقه و والد ماريانا كان صاحب الشركه المنفذه

    سأل أدهم و ماريان
    و ماهو مجمع الاديان
    أجاب والد ماريان
    مجمع الاديان هى منطقه فى مصر بها مسجد عمرو بن العاص أول مسجد فى افريقيا و الرابع فى التاريخ الاسلامى

    و أكمل والد أدهم و سبع كنائس أهمها الكنيسة المعلقة وكنيسة مارجرجس بالإضافة للمتحف القبطي الذي يعتبر من أغرب الآثار القبطية في مصر حيث أن واجهته المعمارية مقتبسة من واجهة الجامع الأقمر بشارع المعز
    و اكملت الوالدتان فى صوت واحد و معبد بن عزرا اليهودى

    سأل أدهم و اين يقع
    اجابه والد ماريانا
    داخل اسوار حصن بابليون فى منطقة مصر القديمه
    أكمل والد أدهم
    و هو ليس المكان الوحيد فى مصر الذى يوجد به جميع الديانات
    اضافت والده ماريانا
    سمعت انه فى الأقصر يوجد معبد فرعونى
    و كنيسه و مسجد فى نفس المكان
    قالت والدة أدهم

    نعم هو مسجد وضريح الامام ابو الحجاج الاقصري المشيد فوق الفناء المفتوح لرمسيس الثاني في معبد الاقصر

    قال والد أدهم و كان هناك كنيستان من القرن السادس الميلادى و ليست واحده
    واحده خلف جدران المسجد

    استكمل الحديث والد ماريانا و قال و الاخرى تم هدمها فى العام 1954 حتى لا تؤثر على المعبد لأنها كانت متهدمه و لا تستخدم و آيله للسقوط

    هتف ادهم و ماريانا فى وقت واحد
    ممكن نروح الاثنين؟؟
    ضحك الجميع و قال الوالدان ان شاء الله



    =======
    الدروس المستفاده
    - الاديان المختلفه لا يجب ان يكون بينهم صراعات
    - التحدث باللغه العربيه الفصحى
    - تصحيح اسماء الحيوانات الخاطئه
    - النظام و الترتيب و احترام الكبير
    - الوحده الوطنيه
    - التعريف بمنطقة مجمع الأديان
    - التعريف بأن مصر جمعت جميع الاديان فى نفس الوقت فى سلام
    - التعريف بمنطقة الاقصر
    - فى حال اضافة الرسوم او الصور تنمى مهارات الطفل الابداعيه

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. من أعلام الإسلام
    بواسطة فكرة في المنتدى مواضيع عامه
    مشاركات: 17
    آخر مشاركة: 18-07-2011, 11:41 PM
  2. مسابقة أحسن قصة قصيرة بقلم المتسابقين
    بواسطة صدفة سعيدة في المنتدى اكتب موضوعا بقلمك [موضوعات بأقلام الاعضاء]
    مشاركات: 5
    آخر مشاركة: 17-08-2010, 05:48 AM
  3. مسابقة من أعلام العلمانية
    بواسطة مبارك عابد في المنتدى مدونة مبارك عابد
    مشاركات: 9
    آخر مشاركة: 07-07-2010, 07:00 PM
  4. علم من أعلام الإسلام (2 )
    بواسطة فكرة في المنتدى مواضيع عامه
    مشاركات: 9
    آخر مشاركة: 15-05-2010, 07:53 PM
  5. من أعمال المصمم الصناعى
    بواسطة entamalak في المنتدى مواضيع عامه
    مشاركات: 9
    آخر مشاركة: 22-08-2009, 10:35 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •